कवितावली (उत्तर कांड से)

किसबी, किसान-कुल, बनिक, भिखारी, भाट, 

चाकर, चपल नट, चोर, चार, चेटकी।

पेटको पढ़त, गुन  गढ़त, चढ़त गिरि, 

अटत गहन-गन अहन अखेटकी।। 

ऊँचे-नीचे करम, धरम-अधरम करि, 

पेट ही को पचत,  बेचत बेटा-बेटकी।

'तुलसी' बुझाइ एक राम घनस्याम ही तें,

आगि बड़वागितें बड़ी है आगि पेटकी।।

खेती न किसान को, भिखारी को न भीख, बलि, 

बनिक को बनिज, न चाकर को चाकरी ।

जीविका बिहीन लोग सीद्यमान सोच बस,

कहैं एक एकन सों 'कहाँ जाई. का करी?'

बेदहूँ पुरान कही, लोकहूँ बिलोकिअतं, 

साँकरे सबै पै, राम! रावरें कृपा करी । 

दारिद-दसानन दबाई दुनी, दीनबंधु !

दुरित-दहन देखि तुलसी हहा करी ।।

धूत कहौ, अवधूत कहौ, रजपूत कहौ, जोलहा कहौ कोऊ। काहू की बेटीसों बेटा न ब्याहब, काहूकी जाति बिगार न सोऊ।। 

तुलसी सरनाम गुलामु है राम को, जाको रुचै सो कहै कछु ओऊ।  

माँगि कै खैबो, मसीत को सोइबो, लैबोको एक न दैबको दोऊ।

लेखक :-- तुलसीदास